政壇：消防總長鬼祟改名被嘲無聊兼自卑

唔怕生壞命，最怕改錯名。消防處最近都為高官職位改名，好似佢哋喺處長同副處長對下嘅一級，一向叫做消防總長（CFO），最近無端端都鬼祟改名做助理處長（簡稱AD），令該處突然多咗七個AD。唔知處長盧振雄搞乜鬼？

癥結在於「Chief」字？

記者最近發現消防處個官網，喺九月起個首長級官員聯絡資料網頁，突然冇晒CFO，唔通班高官集體退休？睇真啲，先發現佢哋全部變晒AD，但佢哋對下一級，即係副總長（DCFO），又完全冇變，都幾奇怪，變成有副冇正。翻查政府新聞網嘅政府部門電話簿，總長個「朵」都消失埋，但之前又唔見有公布，點解咁大個部門漏夜改名咁神秘呀？

喺消防人員非官方網上討論區都有人講呢單嘢，話啲阿Sir今次要印過晒啲卡片，有人留言都幾風趣：「真o架？是否為咗高級助理消防處長進發？」有人就話，始終助理處長好聽過總長。但有一位智慧型網民就話，問題癥結在於一個「Chief」字，因為總長原本英文為Chief Fire Officer，呢位網民質疑：「你哋因為Chief呢個字覺得其他部門睇低你，所以加個無聊title（名銜），等人哋知你係好高級，你哋真天真同自卑囉，特首都係Cheif Executive」。咁又係，Chief唔緊要，做嘢唔cheap自然得到人哋嘅尊重！

消防處發言人表示，唔係改名，對內冇變，都係叫總長，但對外因為好多人唔清楚總長係首長第二級，所以對外就改稱助理處長，發言人又話對內唔變，係因為好多內部程序指引，講明總長嘅權力同職務，所以唔係改名喎。大家係咪都聽到一舊雲？