CULTURE o翕：80後唔lost自己做boss

這次便找來80後青年老闆Ken，分享創業經歷及對青年創業的看法。

80後創業風氣盛行，其中低學歷青年的創業人數，更是顯著增加。低學歷青年創業，不少是「為勢所逼」，由於他們學歷不高，未能獲得心儀公司聘用，他們不想學非所讀，遂將興趣變成事業，開設公司當老闆。香港中華基督教青年會荃灣會所高級程序幹事汪益之亦指出，年輕人崇尚個人主義，不想打工捱日子，促使更多低學歷青少年創業。

‧Ken：80後青年，去年設立「機地歷奇訓練中心」，提供歷奇訓練及室內實用射擊課程。

‧汪益之（香港中華基督教青年會荃灣會所高級程序幹事）

Ken：當年我會考成績唔理想，唔可以讀中六，就讀咗個設計證書課程，希望喺設計方面發展。讀完後，我嘗試搵設計工作，但無論自薦或經朋友介紹，結果都無人肯請我，分析「死因」，係課程認受性唔高，僱主覺得請我，倒不如請個讀完設計嘅大學生。

汪：其實，唔單止坊間嘅證書課程認受性不足，連政府開設嘅毅進、展翅課程，雖然標榜讀完學歷等同會考五科合格，但係僱主始終對呢啲課程有保留，加上缺乏實際工作經驗，令到佢哋好難搵到相關工作。

Ken：長期搵唔到嘢做，令我覺得好迷失，有一段時間都唔知自己可以做乜。因為我對歷奇同室內射擊都好有興趣，後來我就諗，可唔可以喺呢方面開創事業呢？但一開始就面對好多困難，好多嘢都唔識，人哋覺得你係間新公司，又無名氣，根本唔會畀機會你試。

汪：好多年輕人想將專長發展成為事業，但佢哋對創業認識又不足，例如點樣推廣或者搵客源，又得不到其他團體協助，因而放棄創業夢。

Ken：當年我選擇搵母校做起步點，之後母校嘅老師又介紹其他學校或者團體畀我，客人愈嚟愈多，再加上青年會提供地點及器材協助，依家收支取得平衡，足夠支持日常運作。

汪：：我相信將來會愈嚟愈多青少年創業。一來係個人主義嘅興起，青少年唔想受打工束縛；二來係學歷唔到大學嘅青少年，工資同一個中五，甚至初中畢業生差唔多，又缺乏晉升前景，所以，呢類青年就希望靠實力創明天。

Ken：學歷唔高嘅青少年創業，開始時會遇到好多困難，但只要目標堅定，一樣會成功！