政壇：搞搞政：咖啡大王搵陳豪歎啡
咖啡飄香，沉醉其間嘅有「香港咖啡大王」稱號嘅香港餐飲聯業協會主席黃家和（Simon），不過，呢位咖啡大王尋日出席一個電台節目時，就透露想同新一代咖啡王子陳豪歎番杯咖啡，交流吓愛啡心得喎。
Simon嘅父親黃橋及叔父們係香港第一代茶餐廳及咖啡室嘅創辦先驅，西港城旁嘅海安咖啡（舊稱「海安冰室」） 、已結業嘅上海街「九龍冰室」，亦都係黃父於五十年代初創辦。講起陳豪，原來佢哋都有啲特別緣分，事關陳豪做代言人嘅捷榮咖啡，前身捷榮辦館，正係Simon父親於一九三二年創辦，唔知兩個愛咖啡嘅人幾時會聚頭呢？
