政壇：李永健唔做大狀選特首

講起選舉常客，好多人第一時間就會諗到「巴士阿叔」陳乙東，不過，曾以大律師身份出戰過○七年特首同○八年立法會港島區補選嘅李永健都不遑多讓，嚟緊嘅特首選舉，佢都話會參加喎，今次仲係冇做大狀、全身投入添，佢咁專心應戰，起碼比啲遲遲唔肯辭去公職，仲涉嫌濫用公共資源同公職身份拉票嘅疑似候選人有誠意得多啦！

李永健喺發畀傳媒嘅初步政綱中承諾，一旦當選特首，會捐出一半人工畀慈善機構，而且每日最少工作十二小時，仲一定會對犯錯官員作出懲處，包括下台。雖然估計佢九成九九都攞唔到足夠選委提名，不過，政綱嘅誠意就十足。

講到另外幾位可能對手，李永健話，全國人大常委范徐麗泰夠晒高招，扭扭擰擰遲遲唔公布政綱；行政會議召集人梁振英就明顯好想做特首，但似乎好難相處，同現有問責班子關係唔好；而政務司司長唐英年就人緣較好，但過往嘅工作同言論令人摸不着頭腦，難以評論佢嘅真正才能喎！