政壇：舊電池放流料跣直駐港美領事

維基解密（Wikilinks）嘅爆料令唔少國家同政府官員尷尬，前日再喺網上公開逾二十五萬份美國政府機密外交電文，讀者毋須密碼就可以查閱，當中唔少涉及美國駐香港總領事館（領事館），仲可以睇到美方喺香港討論二○一二年政改方案期間，一直密密向各界人士收風，但睇番啲收風者，領事館似乎所託非人，唔係out晒嘅「舊電池」，就係唔知風從哪裏來嘅塘邊鶴，難怪事後證明部分意見果然「完全係垃圾」！

領事館喺○九年十一月向美國有關當局發出電文認為中央唔會對香港政改讓步，而畀意見佢哋作評估嘅人則有中央政策組顧問邵善波、港區人大代表田北辰。電文仲引述邵善波指，中央好可能會提出一個同○五年政改差唔多一樣嘅方案，唔會再作讓步；至於田二少亦向領事館指出，中央一定會對將來嘅特首選舉抓得好緊，以免選出一啲中央唔願意任命嘅特首，最後證明呢啲意見好流。

另一封相信係「五區公投」嘅分析，就搵咗終極普選聯盟成員馬嶽、前港區人大代表李鵬飛及民主黨前立法會議員羅致光攞料。其中馬嶽私底下對中央會否同佢哋談判深表悲觀；李鵬飛認定民主黨唔肯參與「公投」會淪為大輸家，最後咪又錯晒！真係娛樂性十足、準確性欠奉囉。