政壇：政府諮詢會出蠱惑

政府就替補機制搞諮詢會卻爆出數十名示威者強闖會場、甚至同保安員肢體衝突事件，示威者事後力指政府諮詢會有黑幕，質疑當局派飛搵自己友出席、甚至坐有虛席卻唔畀反對者入場，我哋尋日都收到另一宗投訴，踢爆政府因應大政策搞嘅諮詢會有陰招，譬如收集意見時就取巧地營造支持假象。政府梗係唔會認有呢啲茅招啦，但替補機制諮詢會搞手、政制及內地事務局局長林瑞麟尋日就鬼拍後尾枕承認，每次搞諮詢會都有做適當評估，咁都搞出個大頭佛，證明佢哋實在好低招。

只答安全問題免尷尬

政府裝模作樣搞呢啲諮詢會，成日畀人批評得啖笑，最鬧得勁係話佢哋選擇性聽意見。有讀者向我哋爆料，話諮詢會職員喺處理現場發問抽籤過程中出蠱惑，抽中支持者提問嘅機會特別高，點解咁講呢？話說諮詢會開始前，負責官員會先邀請反對人士入場，等佢哋可以先將人名或意見卡放入問題箱內，之後先放支持者進場，並放入意見卡。

咁樣美其名係政府非常尊重反對聲音，但其實係想將所有反對意見卡「沉底」，等支持政府嘅意見卡可以擺喺上面，而主持人亦只係抽取表面嘅意見卡，結果係諮詢會上公開討論嘅大都係安全問題，政府官員都唔會尷尬。

咁啱得咁蹺，林公公尋日出席個活動，都畀人問到有人質疑冇辦法向政府表達意見，佢就答第一場替補機制諮詢會嘅建制派同反對陣營力量均等，即使有關人士喺兩個鐘頭中不斷叫囂，佢哋亦聽到意見，佢仲話，政府從正式同非正式嘅渠道充分吸收咗意見，咁政府使陰招阻撓嘅意見又點計呢？