熱帶語林：學禿鷹狡大辯

淫賊們，上課了，禿鷹一哥曾偉雄真人發聲示範如何利用「捕風捉影」來砌詞狡辯，而且不是小辯，誠屬大辯之作。若然閣下被控以非禮甚至強姦罪，實在有必要好好學習如此神功蓋世的狡大辯，說不定能夠抗辯成功。假設你是非禮疑犯，狡大辯供詞可以這樣──

「冤枉啊法官大老爺，我冇非禮佢呀，當日我只不過見到一團黑影掠過，黑影前面又有一堆黑色物體，基於本能反應我先至出手擋格。你知啦，農曆七月盂蘭節雖然剛剛結束，但冇人夠膽保證光天化日之下唔會撞鬼，我出手擋格純粹防範厲鬼纏身，並非意圖剝奪路人甲乙丙嘅活動自由。我有表露身份o架，我主動向佢報上名來自稱『李米郁』。

「當我稍定心神之後發覺，我出手擋格嘅對象原來係人唔係鬼，而且係一位女士，嗰一堆黑色物體就係佢胸部。我諗住縮手o架喇，可惜吖，我隻手一不小心卡住佢胸圍，所以滯留時間比較長。因為隻手卡住咗吖嘛，所以我就同佢講，小姐呀小姐，唔該畀番隻手我先啦。如果你就咁控告我胸襲民女，實在係冤戾好人呀！」

強姦疑犯狡大辯供詞大同小異──

「冤枉啊法官大老爺，我冇強姦佢呀，當日我只不過見到一團黑影掠過，我一出手擋格，點知何B仔唔覺意卡住佢某個神秘器官，叫佢畀番我都唔得。」

與其說狡大辯的曾偉雄是香港公安局局長，不如說此君實乃中國鐵道部前發言人王勇平的孖寶兄弟，不管你信不信鬼話連篇，反正他是信了。