政壇：搞搞政：立會新大樓減天眼保私隱
立法會行政管理委員會同秘書長吳文華尋日視察添馬艦立法會新大樓嘅閉路電視，原來大樓有成四百幾部咁多，但經保安顧問睇完一輪之後，認為有一百個唔使安裝。
由於新大樓面積大咗好多，令閉路電視數目激增，單喺新大樓外圍已經有三十部。行管會主席睇完之後話，安裝閉路電視要平衡保安同私隱需要，萬一新大樓內有意外、衝突，甚至被人爆竊，保安員都可以睇到確實位置，同埋影低疑犯樣貌。不過，鑑於傳媒不滿，記者室唔會裝喇，可能改裝對講機，讓傳媒同保安保持聯絡。
有議員就批評新大樓正門入口，細到好似個山洞入口咁，人多隨時又變成樽頸位；亦有議員認為公眾席條樓梯太斜要加裝欄杆，而會議室啲枱角太利要整番圓啲，但呢啲只係小問題，唔會影響搬遷嘅。
（設計圖片及對白）