政壇：卓永興隱形辣慶勞界
勞工處處長卓永興上任九個月以來，一直同勞工界保持距離，無論推銷最低工資或處理勞資糾紛，都只係幕後監控，從冇落手落腳主動同工會見面、食飯同聯誼吓。
做隱形處長不特止，話說勞工界爭取強制復職權已經好多年，政府提出修訂《僱傭條例》，上個月再去勞顧會做諮詢，點知到咗開會先知身為主席嘅卓永興放飛機，因為佢放大假，由副處長黃國倫以署理處長身份頂上，勞方委員原本以為可以順利通過，點知就畀班資方代表有機可乘，擔心立法影響營商環境，要再諮詢業界咁話。咁搞法又唔知要拖幾耐先至上到立法會，班勞工界唔(慶)就奇啦！
有勞工界人士話，勞顧會咁多年來都未試過主席放假期間召開會議，事關處長先係主席，卓永興算係破天荒囉。