政壇：立會查黑客醜聞 財金四人幫齊閃

港股早前開始跟隨外圍大跌時，財爺鬍鬚曾信誓旦旦咁話本港嘅交易同結算系統運作暢順，點知翌日立即爆出港交所「披露易」網站遭黑客入侵醜聞，之後佢又立即改口話呢啲事喺其他國家都發生過，非常不負責任。立法會財經事務委員會今日召開特別會議討論事件，包括鬍鬚曾在內嘅政府四大財金巨頭，居然一同缺席！

鬍鬚曾放長假免受靶

早前都講過，歐美債務危機方興未艾，港股不時大上大落，鬍鬚曾卻選擇喺呢個關鍵時間放長假，本身已經好有問題。佢放假嚟唔到，理應由身兼署理財政司司長嘅財經事務及庫務局局長「傻強」陳家強代為受靶，但佢不但唔肯親身出席，甚至連該局嘅常任秘書長、副秘書長都唔派番個，僅派出一名首席助理秘書長出席會議，完全係逃避政治問責、藐視立法機關監察嘅行為。

另外兩個相關機構港交所同金管局亦唔好得幾多，前者僅派出行政總裁李小加開會，唔見港交所主席夏佳理；後者更一名代表都冇，認真離譜。就算金管局總裁「攞命陳」陳德霖覺得單嘢佢哋毋須問責，但事件始終涉及本港金融市場運作同國際聲譽，唔少小股民更因而損手爛腳，金管局求其派個助理總裁去聽吓嘢都好過冇吖？

今日嘅會議除咗討論黑客入侵醜聞，亦會傾吓國務院副總理李克強訪港時提出嘅多項撐港金融措施。對於呢啲「好嘢」，財經局就派出副局長梁鳳儀出席，金管局有派代表，證明有關高官並非真係唔得閒，只係唔想面對議員批評啫！