九展公映幾千人睇過

【本報訊】近日被瘋傳的張栢芝短片名為《狗仔戰俘》，是導演楊龍澄五年前的作品，並曾公開播映，共三條以「戰俘」命名的系列短片，是反映藝人被狗仔隊追得透不過氣的情況。

楊龍澄昨日透過經理人公司發言人李小姐，澄清名為《狗仔戰俘》的短片拍於五年前，是想表達藝人被狗仔隊追訪到透不過氣的情況，絕非外間所指的受虐。

導演楊龍澄來頭勁

李說：「呢段片係為一個演唱會拍攝，喺九龍灣展貿播過，有幾千人睇過。拍咗咁多年，唔明點解依家攞出嚟講，至於塞口，都係想表達被人塞住把口嘅痛苦，並唔係乜嘢被虐，YouTube好耐前已經有，我哋冇刻意發放，至於當時搵栢芝拍攝亦係導演意思，並唔係經朋友介紹。」

畢業於英國的楊龍澄，長年於英國拍攝廣告，名氣頗大，曾執導澳洲天后Kylie Minogue《I Believe In You》及陳奕迅《好久不見》的MV，而另兩段「戰俘」短片分別是何超儀主演的《娛樂戰俘》及李璨琛當主角的《主流戰俘》，何超儀更力撐楊龍澄來頭勁，曾効力著名導演烈尼史葛的RSA公司。