SUN世代：傳奇IT人Apps 創明天
「命運在我手，永不低頭」是余泳峰（Silver）的心聲。年僅二十七歲的他，人生充滿傳奇，與家人關係不睦，十八歲已開始自食其力；試過創業，但均損手而回。雖然屢遇挫折，但Silver沒有被命運擊倒，反而堅信前路是由自己創造。他視互聯網及科技為命運列車，並成立IZense，盼能載他創出精彩人生。
Silver的家庭背景複雜，與父母關係疏離，令他養成內向的性格。為尋找寄託，他逃避到書本及電腦世界，埋首苦讀，會考考獲幾條A，人生看似充滿希望。豈料，十八歲時父親送他一份「大禮」，Silver說：「爸爸話十八歲之後就唔再養我，我要生活就自食其力！」
獲厚賞 萌創業夢
後來，Silver考入中大互聯網工程系，但他不能像普通大學生般參加大學活動，反而要不停做兼職賺學費：「當時要不停補習，由四點補到十點，試過一日補足七堂！」一次厚賞，令他堅信要努力改變命運：「有次幫個有錢仔補習，佢爸爸話我補得好，打賞咗幾千蚊畀我，我成日諗點樣提升生活，唔使咁辛苦！」
漸漸Silver萌起創業念頭：「大學一年級已經諗住搞生意，又睇書學創業，《富爸爸，窮爸爸》令我啟發好大。」由於當時Google冒起，Silver有感IT發展潛力大，於是與朋友合資三萬元做網頁寄存生意，卻慘遭「滑鐵盧」：「當時唔識搵客，只係坐喺度發號施令，全部客都係朋友搵，只係做過幾單生意，之後同朋友意見不合『分手』。」
學搵客 做推銷員
大學畢業後，Silver繼續其創業大計，與同學合辦「永恒的情信」網站，但無人問津，這次失敗令他明白「有生意就要識搵客」。為學搵客，他轉到軟件公司擔任推銷員，不停Cold Call：「日日畀人Cut線，但我無放棄，我明白要先同人做朋友，人哋先會理我！後來我不停撞公司內線去識朋友，仲傾得成生意！」
近年，iPhone興起，Silver睇好apps巿場，心思思分一杯羹。去年，他遇到人生中的「伯樂」——財經界名人王冠一，當時王冠一正找人做apps，還約Silver商談，結果Silver終於傾成第一單生意，還賺得六位數字酬金，為創立IZense奠下基礎。
現時IZense還發展科研，最令Silver滿意的是開發以超聲波結合手機的技術：「呢個認聲音技術，係套用喺iPhone度，好多人有興趣，依家傾緊合作，希望應用喺電視節目！」未來他希望發展室內定位技術：「我相信命運係由自己創造，我會努力實踐夢想！」
Silver's Profile
現職：IZense Innovative Mobile Solutions董事總經理
興趣：寫作、聽音樂、彈琴
學歷：中文大學互聯網工程系學士
余泳峰不相信命運，認為要自己創造一個精彩人生。
Silver（右）與同事關係融洽，十分老友。
遇到「伯樂」王冠一（右），Silver的事業出現轉機。（受訪者提供）
經歷多次生意失敗，Silver從書本中明白要做生意，就要先交朋友。
Silver喜歡打高爾夫球，有姿勢有實際。