政壇：馬浩德稚子問金融術語

滙豐環球投資管理亞太區投資總監兼策略投資總監（股票）馬浩德（Bill Maldonado），由倫敦調任香港唔夠一個月，大致上都好鍾意香港呢個講求效率嘅地方，但尋日朝早就遇上到港後印象最差嘅一件事，就係一對孖仔首日開學，校車竟然冇咗影，最終要親自揸車送囝囝返學。

講起寶貝孖仔，Bill開心到不得了，仲講起佢哋返學嘅趣事。有一日，孖仔追問「乜嘢係Jackson Hole meeting？」Bill聽到都呆一呆，事關五歲孖仔點會知對佢哋嚟講好深奧嘅金融事呢？

原來學校有半個鐘時間討論時事，有同學仔講起，加上有朋友叫Jackson，孖仔自然聯想到「Jackson無啦啦多咗個hole（洞）」，或者「Jackson Hole同black hole（黑洞）係咪有關」。孖仔咁細個已經識問金融界知識，睇嚟會子承父業喎。