政壇：搞搞政：何鴻光代醫學會爭選委
將喺年底舉行嘅特首選舉委員會選舉，醫學界選委議席將由二十席加到三十席，除骨科名醫高永文組成七人名單參選外，香港醫學會亦計劃提名三十人名單競逐，希望有一半人搶到位，戰況激烈。
喺醫學會呢張名單中，據聞暫時答應代表醫學會參選嘅醫生有唔少猛人，包括中信泰富前主席榮智健嘅姪女婿、心臟科名醫何鴻光，以及有兒歌醫生之稱嘅醫學會副會長陳以誠同眼科醫生周伯展。
雖然未知可以攞到幾多選委議席，但醫學會最近已開始約見三名疑似特首候選人，會長蔡堅話會請佢哋講吓政綱，仲要睇吓佢哋係鷹派定係鴿派，係咪會支持惡法同維護新聞採訪自由。
最近社會對替補機制有好多聲音，醫學會十月五號會聯同十個專業團體，包括兩個律師組織，約見政制及內地事務局局長林公公。
(設計圖片)