政壇：姚冠東谷到爆焗出山

港大八一八集會搞手之一姚冠東，自言畢業後十幾年，從未試過行得咁前，今次「出山」全因被校長徐立之同警務處處長曾偉雄激到過咗臨界點，忍無可忍下至聯同一班校友搞集會、搞聯署，矢言唔會咁快收手，「我哋班校友，唔會就咁放過徐立之同曾偉雄！」

九六年做港大學社聯會會長嘅阿東，一提起徐立之就青筋都現埋，佢話校長只識周圍籌款搵銀，對保衞港大校譽就完全失敗，根本係自毀百年校格。九七年回歸前嘅「國殤之柱」事件，阿東都有份搞，佢話當年港大校長鄭耀宗幾龜縮都好，都只係叫保安攔住架貨車，從唔敢叫警察進入港大校園，但今次徐立之畀警察踏入港大校園，同「引清兵入關、中門大開冇分別」。

佢又拍枱大罵曾偉雄以「內地式公安手法」處事，連港人基本嘅言論自由同人身自由都摧毀晒，而且毫無悔意，應該立即下台。佢話，如果煲呔曾有少少政治智慧，都要即刻「怒斬」曾偉雄。