政壇：煲呔曾密冚積假

煲呔曾不時有事就攞大假閃人，依家佢嘅任期剩番十個月左右，為咗有個心理準備佢又隨時閃走，我哋早喺今個月初，跟足手續入紙問特首辦，究竟煲呔曾上任以嚟，積累咗幾多日大假未放、佢每年又有幾多日大假，同埋一旦到佢夠鐘走人，佢儲落嘅假期未清晒又會點算等等。自詡高效率嘅特區政府，足足花咗逾半個月時間至答到呢啲問題。

等咗咁耐，換嚟嘅只係特首辦寥寥幾句近乎可有可無嘅回應。佢哋話煲呔曾一年有二十二日大假，最多可以累積二十二日，所有累積咗未放嘅大假，都會喺佢執包袱嗰日取消，講完。對於到底煲呔曾至今儲埋幾多日大假呢個核心問題，特首辦完全冇觸及。同樣離譜嘅係，我哋有問埋三位司長各自儲埋幾多日大假，特首辦同樣置若罔聞。

嗌「曾生」鼠輩即現身

新政府總部叫「門常開」，意思即廣納民意同埋透明度高，但特首辦拒絕交代煲呔曾仲有幾多日大假未放，將佢嘅假期當做高度機密咁，簡直係諷刺之極，倒不如改叫「門常閂」罷啦！

再講單有趣嘅嘢畀大家聽，話說尋日煲呔曾喺政總新翼，就施政報告諮詢策發會，諮詢期間，新翼外面嘅花槽，光天化日下出現一隻大約手掌咁大嘅老鼠，隻老鼠三番四次試圖走近新翼門口，每次行咗一半，見到有記者就縮番轉頭。「鼠輩橫行」不特止，唔知係天意抑或巧合，記者多次撩隻老鼠出嚟都唔成功，但係一叫「曾生」，隻老鼠就會現身。