政壇：發叔游說哪吒入工專聯

由富貴黨、經濟動力同專業會議等十二名立法會議員組成嘅「工商專業聯盟」，未來會拉攏更多政治人才，特別喺有地區直選經驗嘅政治人才加盟，有傳其中一個拉攏對象係已經退出富貴黨嘅專業動力召集人「哪吒」方國珊。

哪吒係西貢區議會委任議員，有意參加嚟緊十一月區議會選舉。尋日聯同另一名西貢區議員陳繼偉殺入調景嶺開第三間議員辦事處，獲邀主禮嘅新界鄉議局主席劉皇發，就落足嘴頭向哪吒推銷聯盟對香港嘅重要性。至於會唔會搵哪吒加入，發叔話哪吒係細姪女，可以搵個機會傾吓，又鼓勵對方搞好本身工作。之不過，哪吒對加入聯盟一事就不置可否。