政壇：工黨向泛民瘋狂挖角

由五名現任同前任立法會議員做核心嘅工黨，已私下招收黨員。據聞至今正式答應加入嘅只有數十人，明顯較現有三大泛民政黨少，惟有加緊向外挖角，頭號目標係黨員最多嘅白鴿黨，其中會游說曾代表職工盟出選嘅蔡耀昌，以填補工黨喺新界東嘅真空局面。不過，蔡耀昌早排先正式加入白鴿黨，又支持政改方案，有冇可能咁快再轉會呀？

據聞工黨有意游說同樣來自新界東嘅公文袋成員曾國豐過檔，佢過往同跟開嘅公文袋高層不咬弦，加上依家任職嘅國泰工會係職工盟屬會之一，自然成為重點挖角目標。阿豐就話至今冇人正式搵過佢，但亦唔會講死將來一定唔會轉會喎。

工黨喺九龍西同樣係冇人冇物，自然好想拉啲一直專攻九西嘅民協成員加盟。有消息話一旦民協喺嚟緊區選大敗，睇淡民協前景嘅黨主席「老虎仔」廖成利就會名正言順拉大隊過檔工黨喎，係咪成事？等多三個月咪知囉！