政壇：AO流失高政府淪職訓局

嚟緊九月招聘政務官（AO），政府好似驚死冇人申請，專登喺網上賣廣告，仲搵咗兩個約有一年資歷嘅新人講感受，硬銷做AO有幾好。公務員工會聯合會主席梁籌庭就慨嘆，依家AO已非鐵飯碗，有五、六年經驗嘅政務官，都心郁郁想過檔私人公司搵真銀，最終令政府淪為職訓局。

政府今次硬銷AO，搵到兩個後生仔女出鏡，包括喺發展局海港組工作嘅梁家瑋，佢喺英國劍橋大學取得經濟學位；另外，仲有中大畢業嘅運輸及房屋局魏麗盈，佢哋都話學到好多寶貴經驗。

話口未完，財爺鬍鬚曾尋日又喺網誌懶叻話自己有三個大學生做AO實習生，啱係兩男一女合成個「嬲」字。老實講，鬍鬚曾本身已經唔醒，依家仲扮勁去教人，恐怕只會誤人子弟。