政壇：搞搞政 ：胡兆康前隊友狙擊白鴿黨

以狙擊白鴿黨為主要任務嘅選民力量，最近招攬咗同香港首席保齡球手胡兆康做過隊友嘅Carlos黎家朗加入，相信好大機會參加嚟緊十一月區議會選舉，狙擊屯門友愛南選區嘅白鴿黨蔣月蘭，新丁戰老將，戰況相當精彩。

現年二十三歲嘅Carlos住喺友愛邨，佢喺中三加入港隊，同胡兆康前後做咗八年隊友，但由於要落手落腳做地區工作，所以兩星期前就正式退出港隊，轉做保齡球教練，傳授個人心得畀初初接觸打保齡嘅小朋友。

點解咁早投身地區工作？全因為Carlos眼見警權過大，香港嘅公義愈來愈得唔到彰顯。佢話今年七一遊行，市民只係想表達反對替補機制嘅聲音，但警方就如臨大敵布防，最後仲拉咗好多留守到最後嘅後生仔，當時佢喺現場目睹一切之後好感慨，矢言爭取公義絕非十惡不赦，所以一定會繼續為民請命，為公義兩個字努力打拚到底喎！