政壇：扮代表評論警保安 曾德成火上加油

夕陽政府做乜衰乜，國家領導人早前訪港公布新經濟措施，但喺保安安排上，香港警方以鐵腕手段對付傳媒採訪同示威者自由表達意見，惹起公憤。喺各方就核心保安區嘅爭論升溫之際，民政事務局局長曾德成突然「政治抽水」，搭訕評論事件。

既唔係負責經濟財金，又唔係負責保安事宜，基本上同呢單爭議毫無關係嘅德成局長，尋日突然以「把握大局，準確聚焦」為題，喺網上專欄「局長隨筆」大談自己對事件嘅睇法。

夕陽政府尷尬到暈

德成局長認為國家領導人所講嘅各項政策措施，係最值得香港聚焦嘅大事，叫大家切勿受干擾而讓機遇白白流失；又意有所指話世事有大道理、小道理，能夠分清大小、輕重、優次係民智成熟嘅標誌，明眼人一睇就知佢暗寸緊各界關注警方動用過分警力係小題大做啦。佢唔識但係又扮專家突然亂加把口，真係令想低調處理事件嘅夕陽政府尷尬到暈！

話時話，德成局長突然發表火上加油嘅言論都唔係首次，仲記得早前申亞時列舉多個申亞理由，一時又話以市民利益為依歸，一時又話決唔搞缺乏長遠效益嘅華麗工程，但其實全部都係似是而非，完全經唔起推敲，好似政府原來預算申亞直接開支係一百四十多億元，但因民意反對就大幅減少至六十億元，可見當局申亞未經科學論證，而且當市民係白癡玩弄數字遊戲。

老實講，沉寂一時嘅德成局長突然好似塘邊鶴跳出嚟說三道四，究竟係為咗爭取下屆政府有得留低，定係想幫發表「垃圾論」嘅政務司司長唐唐，抑或係為警隊「一哥」曾偉雄擋箭？咁就真係佢自己先知喇！