政壇：西九新總裁擺老父上枱
西九管理局前行政總裁謝卓飛，試用期未夠就快閃。前車可鑑，新行政總裁連納智尋日首次出席立法會會議，班議員都半帶關心同忠告，問佢適應好未、小心香港政治環境。
連納智話適應毫無問題，最差情況係除非佢死咗啦！不過，佢自言剛滿六十歲，仲有大把時間做嘢，仲硬銷自己，話雖然一生從事藝術娛樂界，但佢攻讀政治出身，就快八十九歲嘅老父又喺聯合國做過官，佢喺老父身上學懂如何處理國際層面問題。
寒暄過後，開始入正題。西九工程受通脹同建築成本上漲影響，造價勢必超支，啲議員一講錢就兇神惡煞，質疑連納智嚟立法會放風準備再攞錢。連納智承認依家個造價貴咗，但力撐唔係攞錢，係應立會要求財務安排啫。