政壇：搞搞政：林卓廷回巢 鴿黨鬼打鬼

自從陳家偉涉嫌嫖妓辭職後，白鴿黨搵咗林卓廷做總幹事都未夠一個月，黨內又再出現鬼打鬼嘅情況。黨內傳出佢野心唔小，周圍同人講想下年選立法會直選。

林卓廷早年出走白鴿黨後，喺廉政公署任職調查主任，人工已坐底三萬幾蚊，有黨內第二梯隊話，黨主席「鐵頭仁」何俊仁親自向廉署重金挖佢，又要黨代畀一個月通知金，明顯係對佢投信任票。由於鐵頭仁下年可能會出戰立法會超級區議會議席，到時新界西直選除李永達外，就冇乜人選出戰，所以鐵頭仁諗無可諗下，先急急搵林卓廷回白鴿黨主持大局，甚或由佢頂上出戰新界西。

由於黨內唔少第二梯隊均對林卓廷有戒心，依家佢返黨後即受器重，惹嚟不滿聲音，有人話雖然佢做過三屆主席助理，熟悉黨內派系，但唔代表佢適合選舉。

冷箭橫飛，但林卓廷斬釘截鐵話現時一定唔會出選，亦冇諗呢啲嘢；至於會唔會參與選舉，就係太長遠嘅事，依家要做好總幹事分內工作先。