政壇：18區主席齊摑林公公

政府每逢有爭議性政策，通常會諮詢一大堆地區人士，借佢哋過橋，扮到懶有民意支持，當中區議會正、副主席更係被擺上枱嘅常客。政制及內地事務局局長「林公公」林瑞麟尋日又重施故技，同佢哋開會傾替補機制，仲喺會後話，十八區正、副主席都整體支持政府要堵塞漏洞，唔可以畀議員搞不必要嘅補選。

假諮詢扮撐替補制

就咁聽以為區議會好多人撐政府，但實情係林公公自己幻想出嚟，因為尋日嘅會期原定係上個禮拜四舉行，之後為咗遷就國家領導人訪港，改到去禮拜五下晝，之後又改到上晝，點知臨開會前一兩日，局方又話唔得，要去到尋日先開得。

前後改咗三次期，可見林公公有幾大誠意，搞到有啲主席火都嚟埋，索性缺席以示抗議。深水埗區議會副主席譚國僑就話本來可以出席，但政府好衰唔衰，將會期改嚟改去，諗住喺會上插吓林公公都唔得。葵青區議會副主席麥美娟直頭話好火滾，覺得政府完全冇理過佢哋感受，好似當佢哋一定得閒咁。就算係建仔嘅油尖旺區議會主席鍾港武都話因為撞咗會期，而唔得閒去。

今次肯畀林公公擺上枱嘅，得班委任區議員，但連佢哋開完會後都急急腳走人，唔肯企喺度做布景板，得番林公公一支公出嚟同記者講嘢。可見真係想撐都撐唔落去。

其中一個冇去嘅區議員話，現時正值選舉前最後搏殺階段，差唔多日日要落區，邊有咁得閒應酬林公公，除非班委任議員喇！今次林公公想借區議會過橋嚟個假諮詢撐政府替補機制，點知畀人篤爆，認真肉酸！