SUN世代：拉麵不倒翁 向世界出發

「達磨」即不倒翁，是日本傳統吉祥物及願望之神，日本人相信如像達磨一樣堅持意志，就可克服困難，達成願望。代理歐洲潮服品牌逾十年的陳萬匡（Charlie）， 為願望撈過界，豪擲逾百萬開設達磨拉麵店。為了炮製最完美的濃豬骨湯底，花上四個月時間鑽研，未開業已交逾二百萬「學費」，但正因他的堅持，His Wish Comes True！現時他計劃把達磨國際化，將願望傳播世界。

十四歲到英國留學的Charlie，在英國伯明翰大學修讀酒店管理，但他志不在酒店工作。大學時，他嶄露生意頭腦，睇準潮流，炒賣當時最Hit的Swatch手錶，賺取到人生第一桶金：「有次同Uncle行街，發現啲錶賣三十英鎊，但出到去就炒到成九十英鎊，覺得有前景，就投資呢門生意！」

代理歐洲時裝起家

當時Charlie想到一個無本生利的方法，就是用信用卡購物：「用信用卡唔使即時找數，賣到高價之後，就有錢還，又唔使畀錢先！」炒錶兩年，試過賺取千萬。九三年Swatch潮流過去，他開始環遊世界，了解新潮流趨勢及發掘生意機會。九六年他開設時裝店，代理歐洲品牌，但有次到日本工作，品嘗一碗濃豬骨湯拉麵後，萌起開麵店念頭。

「嗰次去日本公幹，食咗碗濃豬骨湯拉麵好難忘，喺香港又搵唔到類似嘅拉麵，所以決定開一間！」為了這碗拉麵，門外漢Charlie樣樣由零開始：「我做時裝起家，乜都唔識，真係好難！為咗原汁原味，我請日本朋友帶路，飛去日本試勻當地嘅拉麵，搵到目標後照辦煮碗帶返香港做，點知失敗，完全唔係嗰種味道！」

為湯底無悔蝕200萬

Charlie花了足足四個月時間鑽研湯底，又請日本師傅來港傳授秘技。雖然租了舖，但湯底未做好，不敢草草開門做生意，要白交租金：「好多朋友叫我開門做住生意先，但我覺得如果口碑唔好，好難救得番！」閉門四個月仍未成功，Charlie一度心灰意冷：「成日諗係咪未開張就結業，最後畀多一個月自己，唔成功就放棄！」

結果他籌備逾八個月才開業，當時已蝕掉二百萬元，卻無影響Charlie的堅定信念，他本着用心做麵的心態，為港人帶來有Heart的拉麵：「日本好多嘢都唔係正宗，有啲融合其他文化，其實最重要係有冇Heart！」達磨拉麵開業後，每日限售二百碗，未夠一年已經回本，高峰期更吸引逾三百人排隊，外國人也來湊熱鬧。

Charlie今年八月會於銅鑼灣開設分店，但他不甘局限於香港，愛旅遊的他，放眼世界，堅持將達磨全球化：「外國人唔興食豬，所以我研究緊海鮮湯同雞湯等湯底，為打入國際做好準備！」

Charlie's Profile

現職：達磨拉麵店老闆

興趣：旅遊、飲食、購物

學歷：英國伯明翰大學酒店管理學士