政壇：女拔中六生拜尹飛燕為師
依家啲後生仔多數鍾意去唱K，但十七歲嘅拔萃女書院中六生梁心怡偏偏鍾意唱粵曲，尋日仲拜粵劇名伶尹飛燕為師。燕姐大讚新徒弟年紀輕輕就對粵劇充滿熱誠，又勤力肯學，個個都話佢係第二個尹飛燕。
心怡細細個就跟媽媽去睇粵劇，嗰時淨係覺得啲戲服同頭飾閃令令好靚，好鍾意睇，後來大個啲至知粵曲當中包含好多詩詞歌賦，鍾意文學嘅佢被深深吸引，兩年前加入八和粵劇學院嘅青少年班正式學藝。身為八和主席嘅汪明荃就話，心怡拜師好似八和嫁女咁開心，仲可以將粵劇師徒制文化承傳落去添！
心怡話平時讀書辛苦嘅時候都鍾意返八和練習，啲同學仔都會跟埋嚟，仲試過同學校中樂團嘅同學仔Crossover表演。佢話諗住入大學讀完法律就會投身粵劇界，屋企人都好支持佢。
心怡（右）跟足禮節斟茶畀師傅尹飛燕（左）。
汪明荃話心怡拜師好似八和嫁女咁開心。