政壇：華創黎汝雄度橋減成本
租金加、人工加、原材料價格又加，對啲大企業嚟講都幾重負擔。尋日喺華潤創業記者會，首席財務官兼執行董事黎汝雄就話，日日要諗計仔點樣去減輕成本壓力，令到自己本來好瀟灑嘅頭髮都少咗一半。
黎汝雄話成本上升對公司有一定嘅壓力，仲話明白個個投資者想公司股價好似火箭咁升，最好連地心吸力都冇埋，佢都想公司股價每日升一蚊。
華創嘅業務同小市民好有直接關係，例如食品供應、啤酒同超市等，但佢哋要做一間有社會責任嘅良好企業，加上唔想因一次半次嘅加價而失咗一班長期客戶，所以就算喺百物騰貴之下，都只係將小部分嘅成本轉嫁畀消費者。但近期通脹升完再升，睇嚟華創班管理層可能要繼續諗多啲計仔去抗衡至得嘞！
首席財務官兼執行董事黎汝雄