政壇：馮國經創智庫添籌碼

三個月前，利豐集團主席馮國經突然宣布會喺下年三月股東大會上，正式辭去所有職務，被外界視為佢為競選下屆特首鋪路，但佢誓神劈願高調否認。沉寂幾個月，佢靜極思動，尋日宣布成立智庫經綸國際經濟研究院，仲親自出任創院主席。唔通佢想話畀全世界聽，佢除咗係個成功商人，仲係個放眼世界嘅經濟學者？

經綸國際經濟研究院陣容龐大，好多猛人撐場，院長由香港證監會前主席沈聯濤出任，曾獲諾貝爾經濟學獎嘅斯彭思（Michael Spence）擔任學院委員會主席。研究院嘅全球合作夥伴包括美國哈佛大學亞洲研究中心、瑞士洛桑國際管理學院、美國麻省理工學院斯隆商學院等，初期研究集中喺四個全球同中國可持續發展及增長嘅主題，可見馮國經放眼全球嘅野心，同城中智庫嘅級數高下立見。

馮國經曾經係第一屆特首熱門人選，但最後由商人董建華出任，第二任特首就係公務員，如果第三任特首又係由商界出任，唔止欠缺新意，市民都好難有焦點。不過，若果加上智庫學者嘅身份，咁就好唔同，始終學者嘅客觀背景或有助提高民望，而且有咁多財經界猛人坐鎮，日後作為施政智囊團，就唔使好似今屆政府咁，土法煉鋼，閉門造車，惹得民怨沸騰啦。至於佢係唔係參選，好快就會揭盅嘞。