政壇：黑英憂港步倫敦後塵
天文台前台長「黑英」林超英前兩日喺網誌撰文，寫嘅唔再係縮班風波，而係對倫敦連續幾日發生暴亂搶掠為之驚訝。
黑英四十年前曾喺倫敦生活一年，覺得當地直情係一個君子國。近年佢重遊舊地，踏實感覺不復再。佢分析話英政府走崇商路線，經濟係得到改善，但隨之而嚟係物價飛升、民不聊生，年輕一代苦無出路，變成不務正業嘅滋事分子，於是促成今次上街搶掠手機、電腦嘅暴亂事件。
紅燈亮起，黑英話唔係偶然，又直指回歸後香港表面歌舞昇平，但貧富懸殊加劇，專業人士搵食艱難，無暇管教子女，好易養出似倫敦嗰啲眼中只有錢、冇道德規範嘅下一代。
黑英呢番話擺明係擔心香港隨時變成倫敦暴亂嘅翻版，班政府高官收到未？