政壇：下屆特首冇心水 中產唔吼鐵三角

邊個係下屆特首？唔少政圈人士都考考自己眼光，但對一班中產嚟講，原來全無興趣，甚至覺得索然無味。最近有團體做調查，問一班中產最支持邊個出任下屆特首，答案並唔係乜嘢「鐵三角」。

中產動力訪問咗六百幾位市民，個個月入介乎三萬至十二萬，名副其實係中產。「鐵三角」疑似特首候選人當中，民望好高嘅全國人大常委范徐麗泰得一成七人支持，政務司司長唐唐同行會召集人CY梁振英分別只得一成三同一成二。

咦！支持度咁低，睇嚟呢三個都唔係中產杯茶。咁究竟中產有乜諗法呢？原來係冇想法至真，因為答「唔知道」同埋「無意見」嘅中產，就多達四成八，幾乎一半。中產動力主席馮煒光話，結果反映中產深知自己冇能力左右邊個做特首，因為最終人選都係由北京決定，所以冇興趣去估，不如努力工作好過喎。

討厭行政效率低落

雖然成日話中產每日營營役役，對政治漠不關心，其實佢哋對夕陽政府嘅拙劣表現有切膚之痛。馮煒光話中產們最討厭夕陽政府行政效率低落，以南區為例，呢個雲集大量高、中產嘅社區想要一個暖水游泳池，成個工程一啲都唔難，其實只係改建現有設施，點知一拖就拖足七年，中產就係最討厭呢種情況喎！

調查又顯示，中產人士最希望夕陽政府可以「穩定樓價」、「平抑物價」同「改善貧富懸殊問題」。唉，如果係咁嘅話，似乎呢班受訪者預咗失望都得嘞，事關呢幾個問題講咗好耐，幾時見煲呔曾做到嘢吖，反而愈嚟愈差。夕陽政府真係要醒醒定定，否則激發中產上街示威遊行絕食抗議，煲呔曾肯定孭唔起呢隻黑鑊。