政情：陳晴 羅寶文 義賣月餅籌款
聯合國兒童基金香港委員會尋日喺銅鑼灣鬧市展開一連三日嘅月餅義賣活動，支援基金會嘅「非洲之角」緊急籌款項目，協助面臨六十年嚟最嚴重旱災嘅東非國家兒童籌款，主席Judy陳晴同富豪酒店太子女羅寶文齊齊撐場。
其實呢個月餅義賣活動係Judy同羅寶文早前傾閒偈時諗出嚟，寶文仲即刻捐出六百盒富豪酒店嘅月餅參與義賣。Judy話今次富豪捐出嘅月餅價值約十八萬元，佢希望籌款愈多愈好，呼籲家長帶埋仔女去做善事，順便畀香港嘅小朋友知道自己有幾幸福。
中秋節係一家團圓嘅大日子，但Judy暫時冇打算返北京探爸爸陳佐洱，事關囝囝年紀仲細，唔想搭咁長時間飛機折騰。
陳晴（左）同羅寶文講起做善事同聲同氣。