政情：搞搞政：星屑醫生或代戰黃埔東

盛傳會喺年底區議會選舉上演三女大混戰嘅黃埔東選情可能有變，事關有意落場嘅選民力量前港姐Erica袁彌明或會抽身，改由核心成員「星屑醫生」歐陽英傑出戰，聽日仲會落黃埔東做宣傳，據聞人民力量立法會議員黃毓民到時都會幫手站台添！咦！唔知當區議員「鼠王芬」梁美芬點諗呢？

星屑醫生好老實咁話，為咗應對當前變幻莫測嘅政治形勢，佢哋正考慮安排Erica落中西區挑戰白鴿黨立法會議員甘乃威，無他嘅，皆因佢哋近日察覺原本打算喺黃埔東出選嘅白鴿黨新星黃碧雲似乎有啲異動，所以選民力量決定變陣，安排佢落黃埔東做吓嘢，睇睇反應至再作決定。

佢仲話為咗今次落區，特登整咗條新橫額出嚟諷刺其餘兩位疑似對手，上面會印住「美芬與碧雲，根本一類人」。若果兩個疑似候選人走嚟投訴佢會點呀？佢笑住話若然佢哋真係反面嘅話，佢會即時答：「你兩個都係女人囉！」哈！又幾有諗頭喎！