政情:騰訊膺最創新中國公司
《財富》雜誌中文版旗下嘅網站—財富中文網,啱啱公布咗「2011年最具創新力的中國公司」排行榜,騰訊控股、百度同埋萬科企業排首三位,呢個結果唔算意外。
騰訊掌舵人馬化騰年紀輕輕已做出成績,公司成立咗只有十二年,依家係藍籌股,即使近排個股價跌咗咁多,市值依然超過3,300億元。馬化騰早前宣布開放騰訊最核心嘅資產—6.7億客戶群,目標係合作夥伴由依家嘅兩萬家突破到10萬家,分成收入達200億元,相當於騰訊現階段一年嘅收入。睇嚟,騰訊嘅宣言:「全方位平台開放,支持服務,成就夥伴」,係佢哋攞到呢個榜首位嘅關鍵元素。
通常具創新潛力嘅公司,都係嚟自比較「活」嘅公司或行業,所以今年上榜嘅25家企業之中,超過三分之一係不具有壟斷資源嘅市場化企業,呢個數字對比中國500強中,多數嚟自具有壟斷資源企業嘅局面嚟睇,市場化企業喺創新力方面嘅能力好突出。
從地域上劃分,北京喺企業創新方面依然發揮領軍作用,25家上榜企業中總部位於北京嘅佔11家,廣東就係第二大來源省份,共有騰訊、萬科、網易等5家企業上榜。傳統農業公司四川新希望農業則首次入榜,排第16位。
騰訊掌舵人馬化騰