政情:郭位扮嘢踩入迎新營

近年本港大學啲迎新營成日爆出醜聞,包括大玩三級遊戲同虐待新生,但相信城大今年搞嘅迎新營就實冇呢啲嘢,事關有校長郭位親自落去踩場(目及)實吖嘛!

其實,郭校長並唔係信班學生唔過,而係佢向來好鍾意同年輕人打成一片,前日佢出席城大迎新營嘅誓師大會時,喺會上扮鬼扮馬,頭戴羽帽、手揸紙扇,埋身喺眾多學生哥之中,笑容同身邊嘅後生仔一致,形象好親民。尋日佢又現身西貢北潭涌度假營,同喺度舉辦迎新營嘅三百四十名城大新生共進早餐,受到學生熱烈歡迎。之不過,佢食完早餐後就出埠公幹,無法參加埋今日最後一日節目。

頭戴羽帽嘅郭位(中)好玩得,氹到班新鮮人不知幾開心。(城大提供)