政情：聞慳電膽怕怕邱騰華速潛水

夕陽政府班高官，做嘢無能為力，風頭就個個識搶，而一有火頭亦閃得最快，環境局局長邱騰華可以話係最佳人辦。政府尋日就全面取消鎢絲燈泡諮詢公眾，即係要全香港市民轉用慳電膽，唔再用鎢絲燈泡。咁大件事，理應由政策局處理，但偏偏係由機電工程署出嚟公布，咁負責嘅邱騰華究竟去咗邊？原來佢由尋日起開始休假，真係識揀時間放假噃！

煲呔曾舊年喺施政報告推慳電膽券，旋即畀人踢爆益親家，擺明有利益衝突，被譏為「親家膽」醜聞，之後就對慳電膽聞之色變，好有忌諱，而邱騰華更加係聲都唔聲下，久而久之冇咗影。

沉寂一段時間，政府尋日公布諮詢文件，話會陸續取締能源效益好低嘅鎢絲燈泡，既然唔用得鎢絲燈泡，取而代之嘅當然係慳電膽啦。但成份諮詢文件，「慳電膽」三粒字完全隻字不提，好似當呢樣嘢唔存在咁，同掩耳盜鈴差唔多。

搵機電署公布文件

咁大件事，政府只由機電工程署公布文件，相反負責環保政策嘅邱騰華，就完全唔見影。我哋睇完憲報至知，原來身為局長嘅佢，竟然喺重要政策公布時刻放假，由十二號放到十五號，即係話由尋日起休假四日，避開晒成件事，政治「敏感度」非常之高，但責任感就勁低。

邱騰華出晒名做騷先落力，次次對住傳媒鏡頭就大把嘢講，但一遇到棘手政策出台時，就完全唔盡力，例牌唔開記者會，只係求其搞個簡布會就算數，今次佢聽到「慳電膽」後就更驚，索性龜縮休假懶理，咁佢同白逗人工有乜分別呢？