短打長擊：水署推廣慳水搞錯對象

水務署為推廣節約用水，煞有介事斥資七十萬元推行所謂「家居用水研究計劃」，透過家訪及用戶自行記錄調查用戶的用水習慣、對節約用水器具的認知等，目標收集一千名用戶資料，預計明年二至三月可公布分析結果云云。

水務署此舉可說是「賊喊捉賊」、「阿茂整餅」、「整色整水」，皆因佢哋搞錯對象，事實上，最浪費食水嘅就係水務署。

有團體指出，水務署○九年總共輸出約九點五億立方米食水，但地底水管滲漏率達百分之二十一，即係話浪費食水近二億立方米，足夠三十一萬六千人飲用，足夠填滿七萬六千個容水量達二千五百立方米嘅奧運標準泳池。根據粵港簽訂的東江水供水協議，每立方米水價為二元六角，若以此計算，滲漏食水共浪費公帑約五億元！

本港大部分水管已使用很長時間，水管老化係必然嘅事實，所以香城無處不噴水，爆水管無日無之。水務署早於二○○○年推出為期十五年的全港更換及修復水管工程，期望二○一五年更換全港最主要的約三千公里地底食水管，可惜並非像添馬艦新政府總部般日夜趕工，修復水管至今十一年，只係換了一半左右，換言之，食水繼續漏，水管不停爆，水務署繼續倒錢落海。

《東方日報》「功夫茶」揶揄得好貼切：敗家仔教你慳家，水務署啼笑皆非。呢個現象，好似醫生為病人診症，病沒醫好，沒反省自己醫術不濟，反而卸責病人！如今水務署研究慳水之法，卻不先向自己開刀，明顯斷錯症！