政府拖糧真無良 外判無糧太淒涼

港府係全港最大僱主，同時亦係最大無良僱主、最惡無良僱主，惡到可以攞正牌拖糧！

究竟發生乜嘢事呢？嗱，最低工資由五月起實施，但係非常諷刺，港府旗下嘅四萬個外判工之中，原來未達廿八蚊最低時薪嘅人比比皆是。外判商梗係嘈到拆天，唔肯為工人加薪啦，於是咯喎，被指帶頭刻薄工人嘅港府，就要死死氣補番隻鑊，承諾補貼外判商嘞。

好嘞，最低工資實施咗三個幾月，港府補鑊補成點呢？哈，竟然係愈補愈甩漏！外判清潔商組織投訴，七成外判商至今連當局一個仙都未收到。因乜事幹補貼金遲遲未到外判商手呢？原因唔係港府財困，講來講去六個字：官僚作風累事。

原來按港府「出糧」畀外判商嘅手續，外判商通常發薪兩個月後，先至獲港府「回籠」發放相關金額，如果文件資料唔齊，就唔會獲批。港產官僚死板僵化，唔識特事特辦，亦唔識靈活變通，今次一樣照本子辦事，所以咪搞到拖糧，搞到一鑊泡囉。《基本法》話就話香港實行行政主導，跛腳政府做唔到，反而變咗死板官僚行政主導，問你怕未！

本來呢，外判商成日被人話係吸血鬼，拖人糧者被人拖其糧，港府罪孽唔算深重。問題係，覆巢之下無完卵。外判商組織揚言，有同行要向銀行按樓，先至有錢墊支出糧畀工人，若然情況持續，恐怕會爆發倒閉潮，即係話，最終受害嘅又係淒涼嘅基層工人。

嗱嗱嗱，港府最初承諾補貼外判工薪酬，包休息日人工，但係唔包飯鐘錢，當時被工會形容係半個無良僱主。依家港府對外判商拖糧，萬一搞到有外判商將問題轉嫁工人，令外判工被拖糧，甚至被遣散，港府就係十足十嘅無良僱主！

不過，可能港府做無良僱主已經慣晒啦，對於外判工正面臨冇糧出嘅危機無動於衷，你急佢唔急，話要等到外判商提交咗工資補貼文件先至處理喎。咁即係點呀？即係表示港府對工人責任都一併外判，關人個關？定係官僚程序大晒，可以繼續奉旨拖糧？

太一叮不得不提醒港府，拖糧唔止換來無良僱主嘅惡名，更加係犯法嘅，而拖糧令到基層勞工受害，就更加罪無可恕。港府唔想淪為千夫所指，唔該快快出糧，速速磅，唔好兩頭望，叮！