SUN世代：背包旅行認識自我

「○三年（沙士）成個香港都好唔開心，我嗰時覺得一定要去旅行散心，跟住我就咁一個人去咗尼泊爾。」結婚生子後，生命不再孑然一身，但Ranee仍然懷念旅居紐約時一個人的生活，更愛一個人旅遊。靜極思動，相信Ranee 隨時又再揹起背包，向世界出發。

外表嬌滴滴的她，手拿旅遊書便起程，從不多作計劃︰「一個人去旅行，可以靜落嚟，學識同自己相處，照顧自己，更加清楚自己係個點嘅人，發現到平時睇唔到嘅嘢，思考到平時諗唔到啲問題。」到過尼泊爾、雲南和西藏，旅伴都只是自己一人。不會寂寞，不會喊悶，她還嫌時間不夠︰「去雲南麗江時，路上有好多樹，每棵樹嘅形態都好唔同，我逐棵逐棵睇都好忙！」

Ranee擅於留意景色細緻，更擅於從中發現生命的美好︰「望住個見唔到頂嘅天，所有唔如意嘅事都變得微不足道。有咁靚嘅天空，有咁好嘅空氣，個世界咁好，做乜仲要理埋濕濕碎碎嘅嘢喎？」