政情：搞搞政：黃至剛坐艇未驚過

環球股市連日受美國債務評級下調及歐債危機深化影響，搞到日日玩過山車，小股民真係驚到瞓唔着覺，其實好多名人都受影響，有人坐艇、有人心思思撈貨，佢哋似乎都有個共通點，就係都係大笨象滙控嘅捧場客，雖然短暫損手，但都唔怕長揸。

尋日開市冇耐，恒指就跌咗一千六百點，晏晝嘅時候，前馬會行政總裁黃至剛（Lawrence）淡淡定定咁去香港會食晏，佢自爆揸咗唔少滙控，尋日股價跌到去六十六蚊，見兩年新低，Lawrence就話未驚過。佢大派定心丸話，壞消息盡出後，相信股價會升番，唔使驚喎，「長揸一定冇問題。」

工程師學會前會長梁廣灝都係滙控擁躉，佢本來就係長揸等收息，只係近年買少咗。佢話近日環球跌市唔驚就假，擔心美國爆煲後，歐洲都未必企得住腳，不過，佢希望最壞嘅時刻過去後，全球股市會重拾升浪。保良局副主席鄭錦鐘都係股市大好友，睇見通街平貨，佢話心郁郁想掃貨，正盤算分段吸納，心水係具中國概念嘅內銀股或零售股，因為中國經濟仍然強勁，港股唔會差得去邊喎。