政情：孔慶平自喻掌航母巡洋艦
內地正發展首隻航空母艦，上市公司中國海外嘅老細孔慶平尋日講到公司架構時，就率先宣布佢哋嘅航空母艦計劃，唔好誤會，佢只係妙用航空母艦嚟形容旗下公司啫。孔總話，中國海外係一艘航空母艦，旗下另一公司、前身為蜆殼電器嘅中國海外宏洋就係巡洋艦，兩者相輔相成，齊齊喺大海搵食，唔會有衝突喎。
中國海外依家揸住中海宏洋大約37.9%股權，兩間公司主要業務都係內地房地產，但中國海外集中做一二線城市，而中海宏洋就做三四線城市。不過，內地正調控房地產業務，中海外都要去三四線城市避下風頭。孔總就話唔使怕，兩間公司會以唔喺同一城市發展為首要考慮，而且喺定位方面亦會因為各自實力唔同而唔一樣。