政情:樓神外籍師弟觀摩賣地
政府尋日拍賣土地,罕有咁出現一口價成交,令到見慣賣地場上交易牌舉個不停嘅人好詫異,不過,專登嚟觀摩嘅人就冇乜眼福囉!尋日賣地時,有兩位外籍後生仔在場,一度畀人以為係邊個地產公司嘅新血,原來佢哋係交流生,亦係有「樓神」之稱嘅長實執行董事趙國雄師弟。
尋日賣地時,長實執董吳佳慶都在座,個拍賣五分鐘左近就完成。據了解,呢對樓神師弟嚟自加拿大,趁暑假到亞洲區學習同觀摩。
可惜近期股市驚濤駭浪,樓市都吹淡風,搞到原本以為會掀起拍賣高潮嘅九肚山地皮都一口價成交,連本地薑都跌晒眼鏡。