政情：台港合作無寸進

煲呔曾同佢啲高官被批缺乏長遠規劃，其實好多政策都係得三分鐘熱度，好似香港同台灣成立嘅對口溝通組織，「港台經濟文化合作協進會」（協進會）同「台灣經濟文化合作策進會」（策進會）就係一例。

欠實務老鼠拉龜

政府尋日出稿，話兩組織今日會召開第二次聯席會議，佢哋對上一次開會已經係一年前，開會咁疏，難怪整整一年港、台合作都無寸進，仲畀人揶揄好似做戲咁，牽頭呢項工作嘅政制及內地事務局局長林公公一向做嘢都係廢話多過實務，今次老鼠拉龜真係唔出奇。

中央早兩年已對港台官方合作開綠燈，特區政府即刻大鑼大鼓跟進，舊年四月，港台兩地政府成立咗協進會同策進會後，政府高官仲拉隊訪問台灣添，跟住喺八月開咗第一次聯席會議，當時仲話要喺經貿、文化、交通、科技等加強交流同合作。時隔一年，相關政策有冇進展﹖好似影都冇！

咁都未算，當時以商務及經濟發展局局長身份出訪嘅劉吳惠蘭，同一齊過去嘅該局常秘蔡瑩璧，依家一個辭官一個退休，齊齊離開咗政府，原本嘅副局長蘇錦樑遲遲至坐正做局長，商務及經濟發展局轄下有關港台合作嘅嘢可以話半斷纜。加上林公公今年上半年又淨係掛住搞替補方案，港台合作好似畀人擺落雪櫃咁。

政圈口痕友都話，聯席會議一年開一次會，都唔知點樣推動彼此嘅實務工作，唔知嘅人仲以為呢個會係乜嘢峰會咁高級，要一年一閏咁巴閉。

點都好，今日雙方終於開第二次聯席會議，財政司司長鬍鬚曾以協進會榮譽主席身份往致辭，趁機抽吓水，又睇吓呢個一年一度嘅盛會有乜成果。