工廈劏房危機多 有瓦遮頭又如何

曾蔭權話：「香港冇人冇瓦遮頭。」嚴格嚟講，佢講得啱o架，就算露宿者瞓天橋底，舉頭三尺有橋樑，點都叫做有瓦遮頭嘅。至於住籠屋、困劏房、瞓棺材房咯喎，就更加有四幅牆遮風擋雨添啦，只不過係維持一家幾口嘅蝸居，竟然仲細過禮賓府養錦鯉嘅魚池咁解啫。

嗱嗱嗱，大家咁聰明，梗係睇得出太一叮講緊反話啦。事實上，基層飽受蝸居之苦，日子真係相當咁難捱。呢嗱，又有工廈被揭發改裝成劏房嘞，居住環境差劣，消防危機四伏，係就係有瓦遮頭，不過住喺裏面同搵命博差唔多咋。

化身劏房公寓嘅工廈位於大角咀，其中一個單位犀利咯，好似十字(界刂)豆腐咁，左間間，右間間，大家估吓間咗幾多個劏房出嚟？係四十六個！每間房擺到張床，就擺唔到張枱，劏房與劏房之間更加僅僅容得下一個人通過。大吉利是講句，萬一火燭，公公婆婆逃命千祈咪行先呀，唔係實被後面嘅人踩死。

講起火燭危機，工廈劏房比唐樓劏房更加牙煙，事關工廈根本唔係住人o架嘛。業主為咗掩人耳目，要求租客由後門出入，之但係後樓梯防火設施欠奉，又無防煙門，又無照明系統，雜物電線又四圍擺，火燭唔變燒豬都分分鐘仆死啦。

工廈劏房環境咁惡劣，點解都有人入住呢？唔通租客有自虐狂？唉，講嚟講去，咪係驚冇瓦遮頭囉。正如租客楊先生話齋，樓價瘋漲，私樓租金貴到離晒大譜，公屋又輪唔到，無計可施咪惟有被迫入住港式貧民窟囉。正所謂有頭髮邊個想做瘌痢，有經濟能力邊個想住劏房吖？

話時話，住工廈劏房搵命博，住籠屋等基層蝸居，一樣唔會舒服得去邊。今年夏天足以熱死人，有社區組織測試，發現各區籠屋、天台屋同板間房紛紛變晒大蒸籠。其中以深水埗最嚴重，一個數字足以令你熱血沸騰：四十一度！最熱時同室外相差足足九度，居民想唔變熱鍋上嘅蟻民都幾難。

所以話啫，工廈劏房危機多，有瓦遮頭又如何；基層住屋太艱辛，不恤民情煲呔曾。其實，煲呔曾住偌大禮賓府風涼水冷，講基層住屋問題，等如晉惠帝問何不食肉糜嘅啫，不如咁啦，叫煲呔曾住番幾晚劏房籠屋棺材房先至講啦。不過咁呀，煲呔曾，小心到時有大把隔籬鄰舍熱情招呼你呀，叮！