政情：姚珏演戲做番自己

著名小提琴演奏家姚珏，其音樂造詣之高人盡皆知，遲啲仲會粉墨登場走上銀幕添，飾演小提琴高手，即係做番佢自己。

姚珏今日飛往上海拍攝四場戲份，套戲講佢點樣去鼓勵梁詠琪同任賢齊呢啲樂壇後進。姚珏認為音樂同拍戲都係一種藝術，都會好用心咁去演繹。佢不但會親自演奏電影中主要音樂，仲會指導兩位主角嘅演奏姿勢，務求做到最好。呢套由黃珍珍執導嘅電影將喺聖誕期間上映，真係令人引頸以待。

講開又講，四位音樂神童最近齊集香港同香港城市室樂團合作演出《音樂神童全接觸》音樂會，其中之一就係港產嘅鋼琴家沈靖韜，但佢唔認係神童，話神童應該係一出世就識音樂，唔使人教。其他三位神童包括美籍華裔大提琴手陳宗道、喺美國出世嘅小提琴手西蒙娜．波特同年僅十九歲嘅英國年輕指揮兼作曲家亞歷山大．普萊爾。佢哋今次合奏普萊爾嘅新作《沉默的秘密》，演出激情澎湃，充滿活力。