政情：CY問非所答硬銷個人睇法
睇嚟競逐特首選舉入閘可能已到咗關鍵時刻，所以疑似特首候選人、行政會議召集人CY梁振英差唔多個個禮拜六、日都講嘢，務求喺淡靜嘅日子突圍，保持人氣。但佢尋日已去到問非所答，只係顧住播錄音帶硬銷自己對公共政策嘅睇法。
CY尋日去到南區，出席「國際安全社區」確認典禮，佢唔理記者問乜，就開始播錄音帶，話自己做咗二十幾三十年公職，對自己嘅基本要求係唔止愛年輕人，仲係愛國愛港同愛全香港不同年齡組別、不同階層嘅人。大包圍，問你服未！
當記者問佢係咪得個講字，究竟有冇實質管治能力時，佢竟然答自己做咗時事評論工作三十年，一九七七年就第一次投稿，題目係探討香港前途問題。