政情：唐創時畀學生點醒須放手

囝囝囡囡就快要考公開試，家長應該做乜嘢？上任幾個月嘅香港考試及評核局秘書長唐創時就話，唔係買多幾本練習補充亦唔係親自設計幾條題目，最重要都係煲番碗愛心靚湯先！

太關心子女反添壓

都係中學生家長嘅唐創時尋日喺大氣電波透露，早前曾經出席一個大型講座，有成績優異的中學生向全場人士講，最想得到父母的信心，又話：「信我哋啦，放手畀我哋做！」說罷，佢當場醍醐灌頂，反思家長太關心子女，反而為子女徒添壓力，扼殺佢哋的發展，「你唔信任佢，佢自己都冇信心，又點會做得好。」畀呢個學生點醒，令佢領悟到家長終須要放手。

佢千金都係新高中學生，升讀中五，未來會應考第二屆中學文憑試，但曾任大學數學教授、又曾一手發掘數學神童沈詩鈞嘅唐創時就話，唔會為就讀中四嘅囡囡設計大量數學題，皆因太多操練並非好事，「依家都廿一世紀，唔可以死操練爛操練」，費事扼殺佢對學科嘅熱誠喎！