政情：張建宗借王國興過橋

勞工及福利局局長張建宗尋日出席工聯會立法會議員「阿王」王國興地區辦事處開幕禮時大派高帽，話阿王佢哋努力喺立法會發聲，反映市民意見同聲音，令到下情可以上達，所以佢好重視工聯會意見。

但聽真啲，原來張建宗話中有話，佢竟然爆咗句話阿王表達意見時絕非「無的放矢」，又話佢發言理據、背景同訴求兼備，係政府重視嘅聲音咁話。呢句話就可圈可點喇，話阿王唔係無的放矢，即係話立法會裏面有人對政府官員無的放矢啦，唔知張建宗想話邊個，但好明顯佢借阿王過橋啦！

其實，張建宗係甩漏較多嘅局長，遠有外傭稅事件，早幾個月就因為交通津貼做得不得民心，喺立法會畀「長毛」梁國雄掟膠樽。長毛掟膠樽都唔係無的放矢，佢嘅「的」咪就係要表達張建宗做交津做得唔好囉。做人最緊要識自省，唔自省仲要搵機會踩人，咁嘅做法認真唔要得。