政情：IQ博士懶神秘

立法會明年換屆選舉，坊間盛傳至少有十名議員會「落莊」，包括年逾七旬嘅中總代表「IQ博士」黃宜弘，仲傳聞由「新金王」、全國政協委員Kennedy黃英豪接棒。

一時言之過早一時讚黃英豪

IQ博士尋日同傳媒聚會時故作神秘未有表態，一時又話依家表態係言之過早，兼且要計選舉經費，唔可以話講就講，一時又話Kennedy黃英豪係合適人選，但未知對方係咪有意參選喎！搞到成件事疑幻疑真，鏡花水月般，真係令人唔知佢究竟葫蘆裏面賣乜嘢藥，邊句先至係真心話。

眾所周知，政界人士最驚就係有醜聞或者「黑材料」，被問及Kennedy最近曾協助廉政公署調查，會否影響對方出任議員嘅機會，但IQ博士對此冇作任何猜測，只係話自己曾發短訊慰問對方，對方向佢表示「放心」喎，至於Kennedy有冇乘機爭取IQ博士嘅支持同祝福，呢啲就真係只有佢哋兩個人先知嘞！

IQ博士講明年中總嘅議席就守口如瓶，但一講佢嘅新遊艇雙贏（win win）就毫無保留咁有問必答，有時間就帶埋老婆出海食海鮮，又潛水探索吓海洋生態，都咪話唔寫意呀。

佢仲爆料話最近茅台價格急升，撞啱佢早前諗住入二十箱茅台，有朋友知道後想佢讓三箱出嚟，點知最後因為茅台難求，搞到佢都係得五箱喺手，但佢最後都有兌現承諾照畀三箱嗰位朋友喎。

話時話，唔知「鐵三角」疑似特首候選人叫佢幫手同商界說項，要求佢哋支持自己時，佢又會唔會好似畀茅台朋友咁，一樣快人快語呢？