廢柴管理樹木 古樹買少見少

事實再次證明，樹木係唔可以交畀廢柴管理嘅。

呢，尖沙咀彌敦道又有一棵列入《古樹名木冊》嘅細葉榕被斬，聽吓廢柴康文署點樣解釋吖喇。佢哋話喎，呢棵古樹位處人流同車流繁忙地段，結構已經嚴重受損同腐爛，救無可救，所以必須移除以保障民眾安全。

事實係咪咁呢？護樹團體有唔同講法，佢哋到場視察後，發現古樹健康狀況依然理想，強烈質疑當局因為古樹擋路而濫殺樹木。

其實，正如護樹團體話齋，呢棵樹因為位處教堂入口對開，部分樹幹伸出彌敦道，所以經常畀車撞到，多年前已經要求港府為大樹加設反光帶或路牌，提醒司機唔好撞樹，同時斬除部分樹枝方便車輛出入。點知康文署好似借咗聾耳陳隻耳咁，一直闊佬懶理，由得車輛不斷撞樹，卒之將好樹撞成病樹，最後仲要一斬了之，叮！

話時話，大樹生病係自然現象，正如人類一樣，有問題唔等於有危險，關鍵係當局要及時救治，加強保育。好似今次被斬呢棵古樹咁，一直同人類和諧相處，平時為市民遮風擋雨，製造氧氣，美化環境，都唔知幾受市民歡迎。康文署多年來睇住古樹經常畀車撞而無動於衷，今次一出手就斬無赦，再咁落去，古樹遲早畀佢哋斬晒都似。

講開彌敦道嘅古樹，多數已經超過一百歲嘅喇。呢啲古樹扎根九龍心臟地帶，見證香港嘅風風雨雨，既係香港人嘅共同財產，亦係香港人嘅集體回憶。可惜啊，由於當局護理不善，斬完一棵又一棵，古樹買少見少。呢，《古樹名木冊》原本有五百二十六棵樹木，家吓剩低四百幾棵咋，好快就玩完喇！

樹木專家話齋，大部分樹木對抗疾病嘅能力極強，尤其係榕樹，閒閒地可以生長幾百年甚至上千年，只要當局多啲聽人意見，畀多幾錢肉緊，護樹根本唔難。

冇錯喇，護樹的確唔難，難在官僚敷衍塞責，搞到樹木冧完一棵又一棵，仲周不時搞出人命添。雖然當局敲鑼打鼓成立樹木辦，結果多隻香爐多隻鬼，樹木管理一樣係亂七八糟，樹木辦淪為如假包換嘅「廢柴辦」，叮！