CULTURE噏：裸婚Generation

「裸婚」不是赤裸結婚，而是近年內地流行的網絡用語。裸婚熱潮已吹襲到本港，愈來愈多80後、90後青年結婚時選擇裸婚。社會學者崔日雄認為，裸婚的出現，是因年輕一輩對婚姻觀的轉變，認為結婚只是兩人的事。這次記者找到一對打算裸婚的80後情侶Steve及Sally，分享對裸婚的看法。

拍拖兩年，結婚時不打算買鑽戒，買樓及擺酒

Steve：我覺得結婚係兩個人嘅事，所以使唔使買樓，擺唔擺酒，都應該係由番兩個人去做決定，唔應該因為傳統或者其他人咁做，我哋就要跟住去做。

Sally：只要兩個人鍾意對方，就算只係租屋住，都可以生活得好開心。其實，依家香港樓價咁高，兩個人就算節衣縮食，儲十年、八年錢都未必夠畀首期，買咗層樓之後，又要再供多十幾二十年，點解要咁辛苦自己？

崔：年輕一輩選擇裸婚，主要係基於兩個原因，一個係能力所限，負擔唔起高樓價，或做足傳統禮節嘅開支；另一個原因就係奉行浪漫主義，認為兩個人相愛就可以結婚，唔想受傳統束縛。

Sally：依家啲人結婚擺酒，根本就好似做騷咁，好多嚟飲嘅賓客根本唔太熟悉，甚至未見過；咁啲賓客又點會係真心祝福對新人吖！

Steve：好多新人做足傳統禮節，都係因為屋企人想佢哋做，唔係自己想做，咁嘅話做嚟都冇意思。而且搞一啲傳統儀式，好似擺酒咁，真係嘥錢、嘥時間，籌備嗰陣仲可能會有拗撬。與其係咁，不如用呢啲錢同時間，去旅行結婚或者做其他嘢，咪仲開心！

崔：喺傳統意義嚟講，結婚前買樓，同埋做足一啲傳統禮節，可以畀雙方家長審視子女，係咪已有足夠能力，照顧到自己同另一半，亦都係雙方對婚姻有計劃嘅表現。但係八十後年輕嘅一輩，對結婚嘅睇法同心態都唔同咗，覺得結婚唔需要向其親友交代，所以唔重視傳統禮節。

Steve & Sally：對於我哋嚟講，將來結婚都會選擇裸婚，唔會買樓，亦都唔會做足啲傳統儀式，最緊要兩個人開開心心！

崔：只要兩個人喺結婚之前，肯好好計劃呢段婚姻，同對呢段婚姻付出，咁無論係裸婚定傳統婚嫁，都一樣可以好幸福美滿。